«Երկուշաբթին դարձավ ուրբաթ»․ Սիմոնին աղմկոտ ու ջերմ երեկույթով ճանապարհեցին «Եվրատեսիլ 2026»
Հայաստանի «Եվրատեսիլ 2026»-ի ներկայացուցիչ Սիմոնը օրեր անց կմեկնի Վիեննա՝ մասնակցելու տարվա ամենասպասված երաժշտական իրադարձությանը։ Բայց մինչ եվրոպական մեծ բեմ բարձրանալը, երգչի ընկերներն ու գործընկերները նրա համար կազմակերպել էին յուրահատուկ ու շատ ջերմ երեկույթ, որը լի էր երաժշտությամբ, պարերով, հույզերով ու հաջողության մաղթանքներով։
Ապրիլի 27-ին Coba Yerevan-ում տիրում էր բոլորովին այլ մթնոլորտ։ Այնտեղ հավաքվել էին Սիմոնի ամենամտերիմ մարդիկ՝ ընկերներ, գործընկերներ, արվեստի ոլորտի ներկայացուցիչներ ու պարզապես մարդիկ, ովքեր հավատում են նրա հաղթանակին։
Երեկոն նվիրված էր բացառապես Սիմոնին ու նրա եվրատեսիլյան ճանապարհին։ Հյուրերը միասին պարում էին արտիստի «Paloma Rumba» երգի ներքո, լուսանկարվում և կարծես փորձում հնարավորինս շատ դրական էներգիա փոխանցել Հայաստանի այս տարվա պատվիրակին։
Երեկոյի dress-code-ը նույնպես պատահական չէր ընտրված։ Կազմակերպիչները հյուրերին առաջարկել էին ներկայանալ գրասենյակային ոճով՝ ոգեշնչված Սիմոնի եվրատեսիլյան տեսահոլովակից։
Սրահում նույնիսկ հատուկ «գրասենյակային անկյուն» էր ստեղծվել լուսանկարվելու համար, սակայն երեկոյի ընթացքում հաղորդավար Արսեն Գրիգորյանը կատակով հայտարարեց, որ այդ օրը երկուշաբթին վերածվել է ուրբաթի։
«Այսօր պետք է մի կողմ դնել բջջային հեռախոսներն ու պարզապես վայելել երեկոն»,- նշել էր նա՝ ստեղծելով էլ ավելի անկաշկանդ ու ջերմ մթնոլորտ։
Երեկոյի ընթացքում մինչ Սիմոնի բեմ բարձրանալը ներկաների տրամադրությունը բարձրացնում էին Ռոբերտո Կել Տորեսն ու Սարոն, որոնք իրենց ելույթներով բառացիորեն «տաքացրին» դահլիճը։
Սակայն ամենասպասված պահը, իհարկե, Սիմոնի հայտնվելն էր։ Երգիչը բեմ իջավ վերևից՝ խորհրդանշական կերպարով ու իրեն բնորոշ էներգիայով։ Դահլիճը պայթեց ծափահարություններից ու վանկարկումներից, իսկ շատերի համար այդ պահը դարձավ երեկոյի ամենահուզիչ հատվածը։
Սիմոնը նույնպես խոստովանել է, որ նման աջակցությունն իր համար շատ կարևոր է եղել հատկապես վերջին շաբաթների ընթացքում։ Երգիչը նշել է, որ եվրատեսիլյան փորձերը բավական լարված ու հոգնեցուցիչ են, և նման երեկոն իսկական լիցքաթափում էր իր համար։
«Այսպիսի պահերը շատ ուժ են տալիս»,- նշել է արտիստը՝ շնորհակալություն հայտնելով բոլոր նրանց, ովքեր այդ երեկո իր կողքին էին։
Սոցիալական ցանցերում երեկոյի տեսանյութերն ու լուսանկարները մեծ արագությամբ տարածվեցին։ Շատ օգտատերեր գրեցին, որ Սիմոնը բեմում արդեն իսկ եվրատեսիլյան հաղթողի էներգիա ունի, իսկ մյուսները պարզապես մաղթում էին հաջողություն Հայաստանի պատվիրակին։
Հիշեցնենք, որ «Եվրատեսիլ 2026»-ի առաջին կիսաեզրափակիչը կկայանա մայիսի 12-ին, երկրորդը՝ մայիսի 14-ին, իսկ մեծ եզրափակիչը՝ մայիսի 16-ին։
Սիմոնը ելույթ կունենա մայիսի 14-ին՝ 6-րդ համարի ներքո։
Այս օրերին շատերի ուշադրությունը սևեռված է հենց նրա վրա։ Իսկ երեկոյի մթնոլորտը ցույց տվեց, որ Սիմոնը Վիեննա է մեկնում ոչ միայն որպես արտիստ, այլև որպես մի մարդ, ում հետևում կանգնած է մեծ աջակցություն, ջերմություն ու հավատ։