Ֆիլիպ Կիրկորովը վերջապես արձագանքել է Լյուսյա Չեբոտինայի և Լյուբա Ուսպենսկայայի միջև աղմկահարույց հակամարտությանը, որը վերջին օրերին ակտիվորեն քննարկվում է ռուսական շոու-բիզնեսում։ Այս մասին հայտնում է Super.ru-ի Telegram-յան ալիքը։
«Մայքլ» ֆիլմի մոսկովյան պրեմիերայի ժամանակ Ֆիլիպ Բեդրոսովիչը առաջին անգամ բացահայտ խոսել է երկու երգչուհիների միջև առաջացած լարված հարաբերությունների մասին։ Եվ, դատելով նրա խոսքերից, նա ամբողջությամբ կանգնել է երիտասարդ երգչուհի Լյուսյա Չեբոտինայի կողմը։
Կիրկորովը բավական կոշտ ձևակերպումներով է արտահայտվել Լյուբա Ուսպենսկայայի հասցեին՝ ակնարկելով, որ նրա վարքագիծը հեռու է այն կերպարից, որը նա փորձում է ներկայացնել հանրությանը։
«Ինչպե՞ս կարող է հարգված մարդը, երգչուհին, որը իրեն համարում է շանսոնի թագուհի, այդպես վարվել», — ասել է Կիրկորովը։
Նա նաև ընդգծել է, որ անձամբ իր համար շանսոնի իրական թագուհին Իրինա Կրուգն է, ոչ թե Ուսպենսկայան։ Ֆիլիպ Բեդրոսովիչի խոսքով՝ Լյուբա Ուսպենսկայային բնորոշ է մարդկանց հետ հարաբերությունները կտրուկ խզելու և նույնիսկ նախկին մտերիմներին թշնամի դարձնելու սովորությունը։
Կիրկորովը հիշեցրել է, որ ժամանակին ինքն է օգնել Ուսպենսկայային, երբ նա տեղափոխվել է Ռուսաստան, սակայն, իր խոսքերով, դրա դիմաց ստացել է միայն անշնորհակալ վերաբերմունք։
«Ես նշանակալի դեր եմ խաղացել նրա կյանքում։ Օգնել եմ նրան, երբ նա եկել էր Ռուսաստան։ Բայց արդյունքում ստացել եմ լիակատար անշնորհակալություն։ Դե, նա այդպիսի մարդ է», — նշել է երգիչը։
Առանձնապես կոշտ Կիրկորովը խոսել է նաև այն մասին, որ, իր կարծիքով, անթույլատրելի է հրապարակայնորեն վիրավորել երիտասարդ ու տաղանդավոր արտիստներին։ Նա համոզված է, որ Ուսպենսկայայի նման վերաբերմունքի հիմքում կարող են լինել նախանձը, ներքին դժգոհությունները կամ նույնիսկ երիտասարդության հանդեպ խանդը։
«Լյուսյայի նման երիտասարդ, տաղանդավոր արտիստուհուն ծաղրելն ու վիրավորելը պարզապես անպատշաճ է։ Հավանաբար դա նախանձ է կամ դժգոհություն։ Գուցե նույնիսկ երիտասարդության հանդեպ նախանձ», — հայտարարել է Կիրկորովը։
Հիշեցնենք, որ սկանդալը սկսվել էր այն բանից հետո, երբ Լյուբա Ուսպենսկայան բավական կոշտ մեկնաբանություն էր թողել Լյուսյա Չեբոտինայի հասցեին։ Դրանից հետո երիտասարդ երգչուհին հրապարակայնորեն մեղադրել էր Ուսպենսկայային իրեն նվաստացնելու և ծաղրելու մեջ։
Այժմ այս պատմությունը շարունակում է ակտիվորեն քննարկվել սոցիալական ցանցերում, իսկ օգտատերերը բաժանվել են երկու ճամբարի՝ ոմանք պաշտպանում են Ուսպենսկայային, մյուսները՝ Չեբոտինային։