Մինչև 2025 թվականի ավարտը Երկիրը կանցնի մագնիսական փոթորիկների վահանով․ սպասվում է մինչև 50 հարված

Աշխարհը պատրաստվում է մագնիսական բնույթի աննախադեպ հարվածների։ Ռուս ֆիզիկոս Ռոման Կուչերովը news.ru-ի հետ զրույցում զգուշացնում է՝ մինչև տարվա ավարտը Երկիրը կարող է անցնել մինչև 50 մագնիսական փոթորիկների միջով։ Եվ դա դեռ ամենը չէ։

Ըստ Կուչերովի, մենք կանգնած ենք մի ժամանակաշրջանի առջև, երբ Արեւը մղում է իր ակտիվության գագաթնակետին՝ հետևելով մի ցիկլի, որն ամեն 11 տարին մեկ բերում է հզոր էներգետիկ ալիքներ։ Սովորաբար մոլորակը տարեցտարի դիմագրավում է 30-35 մագնիսական փոթորիկների, սակայն 2025-ը բացառիկ է։ Այս տարին արևային ակտիվության ամենաթեժ փուլն է, և այդ պատճառով էլ առաջիկա փոթորիկները կարող են լինել ոչ միայն հաճախակի, այլև՝ չափազանց ուժգին։

Ֆիզիկոսը զգուշացնում է, որ այս փոթորիկները կարող են խաթարել սարքավորումների աշխատանքը, ազդել GPS համակարգերի, կապի միջոցների, արբանյակների վրա, իսկ որոշ դեպքերում նույնիսկ էլեկտրաէներգիայի լայնածավալ անջատումներ են հնարավոր։

Բացի տեխնիկական ազդեցություններից, մագնիսական փոթորիկները կարող են մեզ «նվիրել» վառ գիշերային շոուներ՝ բևեռափայլեր՝ անգամ այնտեղ, որտեղ մարդիկ երբեք չեն տեսել նման երևույթ՝ մինչև տրոպիկական գոտիները։

Հիշեցնենք՝ պատմության մեջ ամենաաղմկոտ նման դեպքը գրանցվել է դեռևս 1859 թվականին, երբ տեղի ունեցավ այսպես կոչված «Քերինգտոնի իրադարձությունը»։ Այդ ժամանակ հեռագրային համակարգերն անսարք էին դառնում, իսկ բևեռափայլը լուսավորել էր նույնիսկ Հավայան կղզիների երկինքը։

2025-ը խոստանում է լինել Արեւի բարկության և Երկրի դիմադրողականության տարվա ստուգումը։ Մնում է միայն հուսալ, որ ժամանակակից տեխնոլոգիաները կդիմակայեն այդ փորձությանը։