Երեխան ստացել է կրկնակի անուն՝ ի պատիվ նրա կյանքն իրար հետ կապած երկու կանանց՝ դոնոր մորաքրոջ և փոխպատվաստման ղեկավար վիրաբույժի։ Նա լույս աշխարհ է եկել 2,06 կգ քաշով՝ լիովին առողջ։
Վերջերս Մեծ Բրիտանիայում բժշկական իրական հրաշք է տեղի ունեցել. առաջին անգամ երկրի պատմության մեջ մայրացել է կին, որի արգանդը դոնորական էր։ Նրա անունը Գրեյս Դեյվիդսոն է՝ 36-ամյա սննդաբան Լոնդոնից, ով դեռ 19 տարեկանում իմացել էր, որ երբեք չի ունենա սեփական երեխա․ նրա մարմինը պարզապես չուներ արգանդ։
Ավելի ճիշտ՝ այդպես էր թվում…
Գրեյսը տառապում էր Ռոկիտանսկի-Կուստներ-Մայեր-Հաուզերի համախտանիշով՝ հազվագյուտ խանգարում, որի պատճառով շատ աղջիկներ ստիպված են հրաժարվել մայրանալու երազանքից։ Սակայն Գրեյսը ոչ միայն չհանձնվեց, այլև ապրեց այն, ինչ ժամանակին թվում էր անհնարին՝ իր մաշկի տակ զգաց հղիության բոլոր զգացողությունները, տվեց կյանք և լույս աշխարհ բերեց բալիկին։
Դա հնարավոր դարձավ շնորհիվ աննախադեպ վիրահատության, որը 2023 թվականին իրականացվել էր իր հարազատ քրոջ՝ Էմիի շնորհիվ։ Սկզբում պլանավորվում էր, որ արգանդը կտա մորիկը, սակայն բժշկական պատճառներով դա անհնար դարձավ։ Եվ հենց այդ պահին հայտնվեց հերոսուհի Էմին՝ երկու երեխայի մայր, ով առանց վարանելու պարգևեց Գրեյսին երկրորդ շանս՝ մայրանալու հնարավորություն։ Արգանդի փոխպատվաստման վիրահատությունը տևել է 17 ժամ, և դա դարձել է Բրիտանիայի բժշկական պատմության էջերից մեկը։
2025 թվականի փետրվարի 27-ին՝ կյանքի և հույսի նոր էջի մեկնարկով, Գրեյսը և նրա ամուսին Անգուսը ողջունեցին իրենց դստերը։ Փոքրիկը ծնվեց կեսարյան հատումով, իսկ նրա անունը միաձուլեց կյանքի երկու սյուների անունները՝ Էմի՝ ի պատիվ մորաքրոջ, և Իզաբել՝ ի պատիվ վիրաբույժի, ով գլխավորել էր ամբողջ գործընթացը։
Ծննդաբերությանը մասնակցել է 20 մասնագետներից կազմված թիմ։ Բոլորն էլ հասկանում էին՝ սա պարզապես ծննդաբերություն չէր, այլ բժշկության և հավատքի միախառնման հզոր պահ։ Մանուկը լույս աշխարհ է եկել 2,06 կգ քաշով՝ լիովին առողջ։
Զույգը ծրագրում է առաջիկա հինգ տարիների ընթացքում ևս մեկ երեխա ունենալ, իսկ հետո Գրեյսի փոխպատվաստված արգանդը կհանվի՝ նրան ազատելով իմունոպրեսանտ դեղամիջոցներից, որոնք կարող են բարձրացնել քաղցկեղի առաջացման ռիսկը։
«Դա պարզապես աներևակայելի էր։ Մենք երբեք չէինք պատկերացնում, թե ինչպես դա կլինի, երբ մեր դստեր առաջին ճիչը լսենք։ Բայց ահա նա՝ մեր հրաշքը», — ասում է Գրեյս Դեյվիդսոնը։
Ի սկզբանե Գրեյսը ցանկացել էր անանուն մնալ, բայց այսօր նա կանգնած է որպես կենդանի խորհրդանիշ՝ հույսի մանուկը ձեռքին՝ ցույց տալով, որ երբեմն կյանքը կարող է ավելի ուժեղ լինել, քան ցանկացած ախտորոշում։
Վիրահատությունն իրականացրած թիմը հետագայում իրականացրել է ևս երեք նմանատիպ արգանդի փոխպատվաստում մահացած դոնորներից։ Նրանք հույս ունեն իրականացնել ևս 15 վիրահատություն՝ տալով հույս և նոր սկիզբ այնտեղ, որտեղ ժամանակին կար միայն լռություն։
Այսպիսի միջամտություններ ամբողջ աշխարհում դեռ համարվում են եզակի՝ 2011 թվականից սկսած կատարվել է մոտ 100 արգանդի փոխպատվաստում։ Սակայն ամեն մի դեպք նոր քայլ է դեպի անպտղության հաղթահարում՝ այնտեղ, որտեղ ժամանակին միակ ելքը որդեգրումն էր կամ փոխնակ մայրությունը։